ISTORGIA

Baselgia our dal temp d'immez

La baselgia romanica da San Niclà (fracziun dal cumün da Valsot), cun seis cor a mezza glüna, es gnüda fabrichada avant l’an 1200. San Niclà as rechatta sper üna via veidrischma, chi traversaiva l’En tras ün vau e probabelmaing fingià al cumanzamaint dal temp d’immez sur üna punt. Cha la via da Ramosch giò per la val manaiva amo vers la fin dal temp d’immez sur Raschvella, cumprova la pittüra monumentala, dischplaschaivelmaing fich donnagiada, dal Sonch Cristof vi da la fatschada vers südvest dal clucher. Ella d’eira visibla als viandants, impustüt sch’els gnivan da Raschvella. Il sonch Cristof es tanter oter il spendrader dals barcharöls e dals fabrichapunts.
Intuorn la mità dal 15avel tschientiner sto esser gnüda fatta la via maistra da la vart schnestra da la val tras Plattamala. Da là davent ha la baselgia da San Niclà pers l’ importanza regiunala. Ch’ella es gnüda dovrada inavant sco ba-selgia almain fin cur chi’d es gnüda fabrichada la baselgia da Strada (1750), cumprova il vout sur la nav, construi l’an 1718.
In il "Anzeiger für schweizerische Altertumskunde" 1876, scrit da Johann Rudolf Rahn da Turich, p. 717, as po leger il seguaint text:
"Schleins, Unterengadin. Die weit unterhalb des Bergdorfes auf dem anderen (rechten) Innufer wenig oberhalb Strada gelegene Kirche S. Nicolaus ist heute in ein Bauernhaus verwandelt. An der S.-W.-Ecke des Schiffes, und theilweise in dasselbe hineingebaut, steht der schmucklose romani-sche Thurm, in den beiden oberen Geschossen mit je zwei gekuppelten Rundbogenfenstern versehen und mit einem niedrigen Zeltdache bedeckt. Die halbrunde Apsis an der Ostseite ist zum Theil zerstört und jetzt mit einem Satteldach versehen. 1874."
Per impedir, cha la baselgia vegna missa ad ir sco chasa da vacanzas o alch sumgliaint, han fuondà diversas persunas interessadas, l’an 1982 üna fundaziun, cul böt da refar la baselgia in sia fuorma uriunta e da tilla metter darcheu a disposiziun a la populaziun.