| Concert classic |
Baselgia San Niclà, Strada
Venderdi, 23 mai 2025, a las 20:15 h
Concert
Jasmine Vollmer, arfa e Stephan Britt, clarinetta inchanteschan al public cun lur clings armonius da glüschur. As laschai surmanar da tour part a quist grondius viadi musical.
Els sunan ouvras da Charles Bochsa, Claude Debussy, Gustav Mahler, Gaetano Donizetti & Franz Poenitz.
|
| Concert |
Baselgia San Niclà, Strada
Dumengia, ils 22 gün 2025, a las 18:15 h
Sömmis
concert da la fuormaziun vocala ENsemble
ENsemble es üna fuormaziun da 13 chantaduras e chantadurs laics da l’Engiadina Bassa chi’d es nada dürant l’utuon 2023. Il plaschair dal chant a cappella, l’ingaschamaint persunal a bön dad ün bel cling e la vöglia da lavurar vi da l’aigna vusch sun ils elemaints principals chi collian las commembras ed ils commembers da quista fuormaziun. La direcziun da l’ENsemble es gnüda surtutta da Miriam Brang. La giuvna violinista e magistra da musica maina la fuormaziun da maniera frais-cha, sensibla e cun ün grond sentimaint musical.
Il tema dal proget da chant 2025 es "sömmis". Sömmis naschan pelplü dürant la not, cur cha no durmin. La not tuorna mincha saira darcheu ed ans maina s-chürdüm, pos e sön. Uschè important sco cha la glüm dal di es per tuot la vita sün terra, tant misteriusa e fascinanta es per no umans la not, eir scha no per gronda part tilla manchantain durmind. La not ans regala sömmis.
Il concert spordscha üna tscherna da chanzuns chi rapreschaintan ün arch paschaivel tanter il far not e l’aurora, passond tras ils sömmis. La litteratura tschernüda pel concert deriva da differentas epocas e va da la musica dal tard renaschimaint fin a quella contemporana. Eir las linguas chi vegnan chantadas fan ün grond arch. Quel va dal talian da Monteverdi fin pro’l russ da Rachmaninoff. Il concert vain inrichi da texts chi s’affan cul tema, prelets da chantaduras e chantadurs da l’ENsemble. |
| Teater Trabichant |
Baselgia San Niclà, Srada
Venderdi, 8 avuost 2025, a las 20:15h
Trabichant: Gian Travers (1483-1563), Jachiam Bifrun (1506-1572) e Duri Champell (1510-1582).
L'onn 2024 ha il chantun Grischun festagià il 500avel anniversari da la fusiun da las Trais Lias. Cun sigillar il Pact federal han las Trais Lias miss l'onn 1524 il crap da fundament per il chantun Grischun dad oz. Sco supplemaint preschaintan Chasper Pult e Jonathan Ferrari üna versioin dal Trabichamp a San Niclà. La rapreschantaziun scenica düra ün’ura. Profitai da l’occasiun e gnit a San Niclà a tour part al teater chi tematisescha l’ourdvart interessanta episoda da l’istorgia da nos chantun, capitada avant 500 ons. |
| Dokumente |
|
